Mill-1 ta’ Ottubru 2022, iċ-ċittadini u r-residenti kollha f’Malta u Għawdex li għandhom Tallinja Card personalizzata huma intitolati li jibbenefikaw minn servizz tat-trasport pubbliku mingħajr ħlas, kif imħabbar mill-Gvern ta’ Malta waqt id-diskors tal-Budget ta’ Ottubru 2021. Is-servizz tat-trasport pubbliku b’xejn kien diġà jingħata lil persuni bejn l-etajiet ta’ 14 u 20 sena, persuni b’diżabilità, studenti ta’ 21 sena u ’l fuq, u persuni ta’ 70 sena u iktar sat-30 ta’ Settembru 2022. Permezz ta’ din il-miżura, il-kategoriji ta’ persuni l-oħra kollha issa huma intitolati għal trasport pubbliku bla ħlas. Dan ifisser li filwaqt li sat-30 ta’ Settembru 2022 129,826 persuna kienu intitolati li jivvjaġġaw bla ħlas, bis-saħħa ta’ din il-miżura aktar minn 501,779 persuna huma intitolati għal trasport pubbliku b’xejn.
L-għan ta’ din il-miżura huwa li jinkoraġġixxi aktar nies biex jagħmlu użu mis-servizz tat-trasport pubbliku sabiex il-pubbliku inġenerali jkollu alternattiva tajba għall-użu tal-karozza. Iż-żieda fl-użu tat-trasport pubbliku jirriżulta f’inqas tniġġis u emissjonijiet tal-gass fit-toroq Maltin b’ambjent aktar imtejjeb u kwalità tal-arja aħjar.
Sabiex tibbenefika minn dan is-servizz bla ħlas, persuna għandha tirreġistra għal Tallinja Card personalizzata hawnhekk. Dan id-dokument irid jintuża mal-magna tal-biljetti li tinsab ħdejn ix-xufier meta tirkeb karozza tal-linja. Tallinja Cards huma dokumenti importanti għax jipprovdu informazzjoni ta’ statistika bil-għan li jgħinu biex l-operatur itejjeb is-servizz fil-futur.
Persuni li għad m’għandhomx Tallinja Card personalizzata jistgħu japplikaw bla ħlas sal-aħħar ta’ Frar 2024. Din l-inizjattiva għal żmien limitat hija maħsuba biex jiżdied aktar l-użu tas-servizz tat-trasport pubbliku.
Aktar tagħrif dwar kif tista’ tapplika għal Tallinja Card u mistoqsijiet komuni relatati jinsabu fis-sit elettroniku ta’ Malta Public Transport fil-paġna t’hawn taħt:
