Dr Chris Bonett ġie elett fil-Parlament f’Marzu 2022 mir-raba’ distrett u nħatar bħala Segretarju Parlamentari għall-Fondi Ewropej. Preżentament qed iservi l-irwol ta’ Ministru għat-Trasport, Infrastruttura u Xogħlijiet Pubbliċi.

Fl-2007, huwa ggradwa b’Dottorat fil-Liġi mill-Università ta’ Malta u fl-2014 gradwa b’Master of Law fil-Liġi tal-Isport minn De Montfort University f’Leicester.

Il-Ministru Chris Bonett serva bħala Viċi President u Kap tad-Dipartiment Legali u tal-Governanza tal-Futbol tal-Malta Football Association (MFA). Huwa serva wkoll bħala Uffiċjal tal-Integrità tal-UEFA u bħala membru tal-Korp ta’ Kontroll, Etika u Dixxiplinari tal-UEFA.

Dr Bonett serva bħala Sindku tal-Gżira bejn l-2007 u l-2012 fejn mexxa diversi proġetti sinifikanti fi ħdan din il-lokalità bħall-ftuħ ta’ Ċentru Komunitarju, il-Librerija Pubblika tal-Gżira, it-training grounds ta’ turf artifiċjali għall-Gzira United Football Club, it-tisbiħ tal-Ġonna tal-Kunsill tal-Ewropa, u proġetti infrastrutturali oħra.

Huwa miżżewweġ lil Dr Maxilene Bonett, u għandhom żewġt itfal, Matteo u Luca.

Skip to content