L-Onor. Dr Jonathan Attard iservi bħala Ministru għall-Infrastruttura, l-Ippjanar u x-Xogħol, wara li nħatar għal din il-kariga f’Ġunju tal-2026. Qabel din il-ħatra, huwa kien isservi bħala Ministru għall-Ġustizzja u r-Riforma tas-Settur tal-Kostruzzjoni, fejn kien responsabbli minn istituzzjonijiet ewlenin fis-setturi tal-ġustizzja, il-kostruzzjoni, il-proprjetà u s-saħħa u s-sigurtà fuq il-post tax-xogħol. Matul il-ħidma ministerjali tiegħu, mexxa programm estensiv ta’ riformi leġiżlattivi, kostituzzjonali u regolatorji bil-għan li jissaħħu l-governanza, titjieb l-amministrazzjoni tal-ġustizzja u jogħlew l-istandards fis-settur tal-kostruzzjoni. Bħalissa, huwa inkarigat mill-politika nazzjonali dwar l-infrastruttura, l-ippjanar u l-impjiegi.
Matul il-leġiżlatura li għaddiet huwa mexxa numru sinifikanti ta’ abbozzi ta’ liġijiiet fil-Parlament, flimkien ma’ korp estensiv ta’ leġiżlazzjoni sussidjarja. Fis-settur tal-ġustizzja, ir-riformi kienu jinkludu emendi għall-qafas legali li jirregola l-inkjesti maġisterjali, li introduċew salvagwardji aktar b’saħħithom għall-vittmi, aktar kontabbiltà u proċeduri aktar effiċjenti; riformi fil-liġi tal-familja u fil-Qorti tad-Droga; l-estensjoni tal-miżuri tat-Tieni Ċans; u t-tkomplija tal-ispeċjalizzazzjoni tal-qrati, inkluż it-twaqqif tal-Qorti Kummerċjali. Huwa mexxa ’l quddiem ukoll emendi kostituzzjonali li saħħew il-qafas ta’ governanza u kontabbiltà tal-ġudikatura, fosthom it-twaqqif tal-Kummissarju għall-Istandards fil-Ġudikatura. Matul il-mandat tiegħu, Malta rat żieda bla preċedent fin-numru ta’ Mħallfin u Maġistrati, bil-għan li titjieb l-effiċjenza tal-qrati u jitnaqqas id-dewmien fl-amministrazzjoni tal-ġustizzja. Ġiet inawgurata wkoll Awla ġdida mgħammra b’teknoloġija avvanzata, li għall-ewwel darba f’Malta ppermettiet li jinstemgħu simultanjament ġurijiet kriminali.
Fis-settur tal-kostruzzjoni, huwa mexxa ’l quddiem l-adozzjoni ta’ qafas ġdid dwar is-Saħħa u s-Sigurtà fuq il-Post tax-Xogħol, l-introduzzjoni ta’ sistema ta’ liċenzjar għall-kuntratturi, ir-riforma tas-sistema tal-liċenzjar tal-bennejja, kif ukoll l-iżvilupp ta’ servizzi ta’ sostenn għar-residenti affettwati minn attivitajiet ta’ kostruzzjoni.
Qabel ma ngħaqad fil-Kabinett, Dr Attard ipprattika fil-professjoni ta’ avukat quddiem il-Qrati Maltin, b’mod partikolari fl-oqsma tad-Dritt Ċivili, id-Dritt Pubbliku, id-Dritt tal-Proprjetà, id-Dritt tal-Ippjanar u d-Dritt Kummerċjali. L-esperjenza professjonali tiegħu kienet tinkludi wkoll xogħol fl-abbozzar tal-leġiżlazzjoni, il-governanza u l-amministrazzjoni pubblika. Dr Attard ġie co-opted fil-Kamra tad-Deputati f’Lulju 2021 wara appoġġ unanimu mill-Grupp Parlamentari u mill-Eżekuttiv Nazzjonali tal-Partit Laburista. Sussegwentement ġie elett fil-Parlament fl-Elezzjoni Ġenerali tal-2022.
Matul il-ħidma parlamentari tiegħu, serva bħala Kap tad-Delegazzjoni ta’ Malta fil-Kunsill tal-Ewropa, fejn aktar tard ġie elett Viċi President tal-Assemblea Parlamentari tal-Kunsill tal-Ewropa. Huwa serva wkoll fuq diversi kumitati parlamentari, fosthom fil-Kumitat għall-Kontijiet Pubbliċi.
Qabel daħal fil-Parlament, Dr Attard okkupa diversi karigi fis-settur pubbliku, fosthom fil-Ministeru għall-Ekonomija, l-Investiment u n-Negozji Żgħar, kif ukoll bħala uffiċjal ta’ kollegament bejn il-Ministeru u Malta Enterprise. Huwa ta kontribut tiegħu f’diversi riformi leġiżlattivi, fosthom l-emendi kostituzzjonali tal-2018 u l-leġiżlazzjoni li estendiet id-dritt tal-vot fl-elezzjonijiet nazzjonali liż-żgħażagħ ta’ 16-il sena.
F’Ġunju 2018, inħatar membru tal-Kumitat Tekniku għall-Avvanz tad-Demokrazija Rappreżentattiva, fejn ta pariri lis-Segretarju Parlamentari għar-Riformi, iċ-Ċittadinanza u s-Simplifikazzjoni tal-Proċessi Amministrattivi fi ħdan l-Uffiċċju tal-Prim Ministru. F’din il-kariga huwa kkontribwixxa għat-tfassil ta’ emendi kostituzzjonali u riformi leġiżlattivi oħra.
Dr Attard iggradwa mill-Università ta’ Malta b’Baċellerat fil-Liġi fl-2011 u Diplomata’ Nutar Pubbliku fl-2012. Huwa kiseb id-Dottorat fil-Liġi fl-2014 u fl-2015 għadda mill-eżami tal-warrant, u beda jipprattika quddiem il-Qrati ta’ Malta. Barra minn hekk, huwa għandu wkoll Baċellerat fil-Komunikazzjoni u l-Istudji Soċjali mill-Università ta’ Malta.
Qabel il-karriera tiegħu fil-liġi u fil-politika, Dr Attard ħadem fis-settur tal-midja, fejn bena karriera bħala ġurnalist, preżentatur ta’ programmi ta’ ġrajjiet kurrenti u qarrej tal-aħbarijiet. Kien ukoll involut b’mod attiv fil-General Workers’ Union.
Matul il-karriera tiegħu, Dr Attard kiseb diversi esperjenzi fil-midja, il-liġi, ir-riforma leġiżlattiva u s-servizz pubbliku. Bħala Ministru għall-Infrastruttura, l-Ippjanar u l-Impjiegi, huwa kompla jiffoka fuq l-iżvilupp tal-infrastruttura, il-politika tal-ippjanar u l-impjiegi, b’appoġġ għall-iżvilupp ekonomiku u soċjali ta’ Malta.